14 . కృష్ణపక్షం

కృష్ణపక్షం

నడిరాతిరి నిశీధిలో నీకై నే వెదుకుతుంటే
ముసురుకున్న చీకట్లు నన్ను చూసి నవ్వాయి
అమావాస్య తిమిరాలు హేళన చేసాయి
"వెన్నెలా ఏడీ నీ నేలరాజ" ని అడిగాయి

శుక్లపక్షం వచ్చిందని నే సంతోషిస్తూ
పున్నమి రోజున నీకై ముస్తాబవుతుంటే
మబ్బుతెరలు నిన్ను కమ్ముకున్నాయి
అడ్డుగా వచ్చి నన్ను చూడనీకున్నాయి

తప్పుకోమని నేను ప్రాధేయపడితే
"ఎందుకీ మిడిసిపాటు వెన్నెలా...
          తెల్లవారితే నీకు కృష్ణపక్షమేగా" అన్నాయి
పట్టరాని దుఃఖంతో నేనుంటే
ఓదార్చవలసిన  నీవు మబ్బులతో ముచ్చట్లాడావు

ఏమైనా...
               నా జీవితమిక  కృష్ణపక్షమేనా!

(01/03/04)

13. నా తోడు

నా తోడు

కనురెప్ప నీవై నను కంటిపాపలా కాచుకోవాలి,
నా తోడు నీడవై చంటి పాపలా చూసుకోవాలి,
నా నుదుటన తిలకమై నూరేళ్ళు నిలచిపోవాలి,
పెదవిపై చిరునవ్వుగా మారి చిరకాలం ఉండిపోవాలి,
కలతపడ్డ మనసుకు ఓదార్పువై లాలించాలి,
నే కనుమూస్తే నీ మదిలో సేదతీర్చాలి...

(01/03/04)

12. కావాలి

కావాలి


నీ కన్నులలో వెలుగు నేనే కావాలని ఉంది
     కలలో నాయికగా మారాలని ఉంది
నీ గొంతులో మాటలు నేనే కావాలని ఉంది
     పలుకుల్లో భావంగా మారాలని ఉంది
నీ ఉపిరిలో శ్వాస నేనే కావాలని ఉంది
     శ్వాసలో ఆశగా మారాలని ఉంది
నీ గుండెల్లో ప్రాణం నేనే కావాలని ఉంది
     గుండె చప్పుడుగా మారాలని ఉంది
నీ నడకల్లో అడుగు నేనే కావాలని ఉంది
     అడుగుల్లో తోడుగా మారాలని ఉంది
నీ ప్రతి అణువూ నేనే కావాలని ఉంది
     జీవన సహచరిగా మారాలని ఉంది
నీ నీడగా బ్రతుకుదామని ఉంది
     నువ్వే లేకుంటే నా జాడ ఎక్కడ ఉంది.

(01/03/04)

11. నా ప్రాణం

నా ప్రాణం

మబ్బు ముసురు లేకుంటే నెమలి ఆట సాగేనా!
వసంతమే వద్దంటే కోకిలమ్మ కూసేనా!
మాఘ మాసం రాకుంటే మల్లెలు పూసేనా!
శుక్లపక్షం  కాదంటే వెన్నెల విరిసేనా!
నీ ప్రేమే లేకుంటే నా ప్రాణం నిలిచేనా!

(28/02/04)

10. నువ్వు

నువ్వు


నువ్వు లేని తీరం చేరుదామంటే...
     ఎంత దూరమైనా నువ్వు నిలిచిన ఈ భూమియే ఉంది
నీ ఊహ నా దరికి రాకూడదనుకుంటే...
     నీ శ్వాస చిరుగాలితో నను చేరుతుంది
నీ రూపు కలలోనైనా చూడకూడదనుకుంటే...
     నిత్యం నా కన్నులలోనే కనబడుతుంది
నీ పేరు నేనెపుడూ వినకూడదనుకుంటే...
     అది నా గుండె చప్పుడై మోగుతుంది
నీ జ్ఞాపకాలు నను ముసురుకోకూడదనుకుంటే...
     నిను ప్రేమించిన ఈ మనసే నాతో ఉంది.

*చివరకు ఏమని తేలిందంటే..
     నాకు నేను దూరమైతేనే ... నిన్ను నేను మరువగలనని.

(28/02/04)

9. మరచుట

మరచుట

మరులు గొలిపే నీ ప్రేమ మరచుట సాధ్యమా!
అనుక్షణం నిన్నే తలచుట మనసుకు కష్టమా!
నువ్వులేని ఈ జీవితం నాకేమైనా ఇష్టమా!
వలచి వగచి గుండె పగిలితే భయమా!

నిన్ను విడిచేకన్నా...
          మరి మరిచే కన్నా...
                  ఇలా నిలిచే కన్నా...
                          మరణిస్తే చిత్రమా!

(28/02/04)

8. ప్రియా..

ప్రియా..

వెన్నెలమ్మతో జతకట్టావా చందమామ...
కలువ భామ కలలేమైనాయో పాపం

గంగను తెచ్చి తలపై పెట్టావా పరమేశా...
మరి సగం దేహం పార్వతికి ఎందుకయ్యా

 సత్యను కోరి చేసుకున్నావా గోపీలోల...
వలచి వచ్చిన రుక్మిణి ఏమయ్యేనయ్యా

వేరెవరినో కోరుకున్నవా నా ప్రియతమా...
నిన్నే తలచిన నన్నే మరిచావా
నువ్వే మరిచాక ప్రాణం మిగిలేనా!

(28/02/04)

7. నా ప్రాణం

నా ప్రాణం


కలలో కొచ్చే నీ రూపం
                                 నా గుండెలో కొలువై ఉంది
పెదవులు తలిచే నీ పేరు
                                 నా గొంతును దాటి రానంది
ప్రేమలు పూచే నా మనసు
                                 అది నిన్నే పూజిస్తానంది
మమతలు పొదిగిన నీ మనసున
                                 నాకే స్థానం కావాలంది
మదిలో మెదిలిన చిరు ఆశ
                                 నీ వైపే పరుగులు తీస్తోంది
నన్నే విడిచిన నా శ్వాస
                                 నిన్నే అల్లుకుపోతుంది
నాలో వుందా నా ప్రాణం
                                 మరి నీలోనేగా అది వుంది.


(28/02/04)

6. నువ్వు - నేను

నువ్వు -  నేను

నువ్వు తప్ప లోకమే లేనట్టు,
గుండెల్లో నీ రూపు కొలువయ్యేట్టు,
మనసంతా నీ పేరే తలచేట్టు,
నీ కోసమే నా ప్రాణం నిలిచేట్టు,
క్షణం క్షణం ... ప్రతి క్షణం నీకై నేనుంటే..

నన్ను నేను మరిచేట్టు,
చిన్ని గుండె రగిలేట్టు,
కనులు పొంగి పోరిలేట్టు,
మనసు మూగబోయ్యేట్టు,
చేశావు నేస్తమా! నీ కిది న్యాయమా?


(28/02/04)

5. ప్రేమా

ప్రేమా 

మరణాన్ని వరమిచ్చినావమ్మా.. ప్రేమా 

మదిని మరుభూమిగా మార్చేసినావమ్మా

మనసార మనసివ్వతమేనా నే చేసిన నేరం.. ప్రేమా 

ముక్కలైన మనసేమో నువ్విచ్చిన బహుమానం 

ప్రాణానికి ప్రాణంగా ప్రేమించటమే నే చేసిన పాపం 

ప్రాణం లేని జీవంగా మిగాలాలన్నది నువ్విచ్చిన శాపం.

(22/02/04)

4. చెప్పలేను, దాచలేను

చెప్పలేను, దాచలేను

ఎన్నెన్ని భాదలో కదిలే కన్నీళ్ళలో
ఎన్నెన్ని భావాలో భారమైన గుండెల్లో
చెప్పలేను, దాచలేను

మోయలేని వెతలవుతున్నా,
బ్రతుకు భారమవుతున్నా
చెప్పలేను, దాచలేను

 కొంటె కన్నీరు నీ చేయి ఓదార్పు కోరుతున్నా...
చిన్ని మనసేమో నీ మనసు తోడు అడుగుతున్నా...
గుండె సడిఏమో నీ నీడ సేదతీరుదామన్నా...
నాలోని నేనేమో నీ ప్రేమ ఎంత వేడుతున్నా...
చెప్పలేను, దాచలేను

చెప్పి చెప్పి నిన్ను నే విసిగించలేను...
దాచి వుంచి నన్ను నే మోసగించలేను...
ఏనాటికైనా నా మనసు తెలుసుకుంటావని,
ఒకనాటికైనా నా కోరిక మన్నిస్తావని,
ఎప్పటికైనా నా ప్రేమ నిను గెలుచుకుంటుందని
ఆశపడుతూ... శ్వాసతీస్తూ... ఎదురు చూస్తూ....

 (21/02/04)

3. మౌనం

మౌనం

మౌనం రాగమై అనురాగం పలికే
మౌనం భాషయై అనుబంధం తెలిపే
మౌనం భావమై నా గీతం పలికే
మౌనం ప్రాణమై నా ప్రేమను తెలిపే.

ప్రేమతో తెలుసుకుంటే
మౌనమే వినిపించు నా కలలను
మౌనమే పలికించు నా మమతను
మనసుతో చదువుకుంటే
మౌనమే చెప్పవా నా హృదయము
మౌనమే తెలుపదా ప్రేమ భారము.

కన్నులలో కొలువున్నది నీవేనని,
మూసివుంచినా, తెరచి చూచినా
కదలాడే నీడ నీదేనని.. చెప్పాయి
నా కనులు మౌనంగా పలికాయి.

అదిరిపడే అధరాలు
నీ పేరును మౌనంగా తలచాయి
మనసున పదిలంగా దాచాయి.

అడుగుపడితే నీ వైపేనని
ఏడడుగులు నీతో నడవాలని
నా పాదాలు తపన పడ్డాయి
నీకై మౌనంగా వెదికాయి.

(13/02/04)

2. నీ దూరం

నీ దూరం

ఏమైనా, ఎపుడైనా, ఏ చోట నేవున్నా...
మనసంతా నీ ధ్యాసే,
మననంలోను, మరణం లోను...
నీ పేరే మది పలికే,
ఊపిరిలోను, ఊహల్లోను...
నీ రూపే యద తలిచే,
కలలోనైనా, ఇలలోనైనా...
నే కోరేది నీ చేరువే,
గతిలోనైనా, చితిలోనైన...
మది వేడేది నీ ప్రేమనే,
నీ దూరం మోసే భారం...
నా హృదయానికి లేదే.

విడిపొతే
క్షణకాలం యుగమై తొచదా!
కలకాలం కన్నీరే మిగలవా!
యదలో వేదన నీకు తెలిపేదెలా!
మాటలు రానంటే, పాటలు రాకుంటే
గుండేల్లొ గుసగుసలు నిను చెరేదెలా!
ఊపిరి లేకుంటే, జీవం మనగలదా!
గుండే లేకుంటే, ప్రాణం నిలిచేదెలా!
నువ్వే లేకుంటే, నేను బొమ్మైపోనా!
బొమ్మై బ్రతికేకంటే, చావే మేలనుకోనా!
నీ దూరం మోసే భారం...
నా హృదయానికి లేదే.

విడిపొతే
యదలో వేదన నే తాళగలనా
గుందే బండైతే బాగుండనుకోనా
మనసూ నీతొ వెళ్ళిపోతే
బ్రతుకే సుడిగుండం దాదా!
నీ దూరం మోసే భారం...
నా హృదయానికి లేదే.

ఎంత చెప్పినా, ఎన్ని చెప్పినా
నా ప్రెమ నీ మది చేరదా!
చేరినా దాని వేదన వినే
తీరికే నీకు లేదా!
కవిత కాదిది మమత అని తెలుసుకోలేవా?
కధ కాదిది వ్యధ అని పోల్చుకోలేవా?

కలిసుంటే కలకాలం
కలలన్నీ ఫలియించవా
మదిలో ఫ్రేమను మన్నించవా?
నా ఆరాధన సఫలం కాకుంటే,
నేనే ఆహుతి కానా!
నా ప్రేమ నిను జయిస్తే,
నీకే హారతి కానా!

(02/11/03)

1. మది

మది

మదిలో మెదిలే భావాలే పెదవుల భాషై రానంటే
మౌనం రాగంగా మమతలు పాడంగా
కన్నులు వేదికగా ప్రేమలు కురియంగా
మనసుకు మనసే అద్దం కాదా
యదలో వేదన అద్దం కాదా?


(8/12/03)

ఈ బ్లాగ్ గురించి:

నా వైఫ్ కవితలు బాగా రాసేది. మేము కాలేజీ లో ఉన్నప్పుడు నా గురించి మంచి మంచి కవితలు రాస్తుండేది, కాని తరువాత మానేసింది. ఈ మధ్యనే పాత పుస్తకాలు వెతుకుతుంటే తన పాత కవితల పుస్తకం కనిపించింది. అది చదివాక నాకు ఆ కవితలను జాగ్రత్త చెయ్యాలనిపించింది. అందుకే తన కవితలను ఈ బ్లాగ్ లో ఉంచుతున్నాను. మొత్తం అన్ని కవితలు పూర్తి అయ్యాక, తనని surprise చెయ్యాలి. నాకు తెలుగు టైపింగ్ అంతగా రాదు. దగ్గర దగ్గర 12 years అయ్యింది నేను తెలుగులో రాసి.